قصيدة تستفز المشاعر للشاعر النجم غزاي العضياني

[نواف منيف]

قصيدة لشاعر المحاوره والنظم غزاي العضياني


يا ليل يا كثر العتب والمشاريه

وقلب يفوز بطعنته كل غالي

ما باقي الا نعطي القوس باريه

ونصبر على رماح الجفا والتعالي

لا طاح حظك ما حدن جاء يصحيه

وان قام حظك عد روس الجبالي

سجوى غرامه ساقها صحصح التيه

يطوي مسافات الديار الخوالي

دونه سراب البعد يشر باياديه

تحدرت به نجد يم الشمالي

لا غاب واقفى من توده وتغليه

ما عاد له طاري ولا له مجالي

يمر في بالي ولاني بناسيه

الا ليا غفيت جاء في خيالي

كنه يصحيني بصوته وانا اوحيه

جدد جروحي ما تركني بحالي

حسبي عليه الله والله يجازيه

ما لي وما له كان ما له وما لي

اهوه يبيني لا رحل عني ابكيه

والا يبي دمعي ليا جف سالي

والا يبي شعري تسابق قوافيه

عليه لكن صعب ذل الرجالي

والله ما طيعه فالخطا اللي يسويه

صحوة عقل والا جنون الهبالي

لو كان حبه شاهرات غوانيه

ما هو بحب ما له اول وتالي

ولو كان انا ما اقوى فراقه ولا بيه

ابقى عزيز النفس بين العيالي

من باعني بعته ولا يمكن اشريه

اجزف وابيعه لو بربع الريالي

ومن لا تربى خل وقته يربيه

ماني مربي مثل سود الليالي

[سعد العصيمي]

صح لسان الشاعر غزاي العضياني وقصيده طيبه بالحيل



بيض الله وجهك يانواف منيف


تسلم

[جـــووود]

ولو كان انا ما اقوى فراقه ولا بيه

ابقى عزيز النفس بين العيالي

من باعني بعته ولا يمكن اشريه

تســـــــــلم علي هالقصيده

صح لسانك وصح لسان قايلها

[نواف منيف]

سعد العصيمي

شكرا على مرورك العاطر