[]::.::[] معـــــَــارك قبيلــــه عتيبـــــــه []::.::[]
[]::.::[] الجـــــــزء الاول []::.::[]
معــــــــركــه طلال
اسباب المعركه :
للمعركه عدّة اسباب :
السبب الاول-ان الامير مسلط بن ربيعان لم يفد على سعود , ولم يبايعه ولم يعطه الزكاة ..يقول المؤرخ مقبل الذكير في مخطوط (مطالع السعود)
(....لما حصلت الانتصارات لسعود على أخيه عبدالله , في وقعتي جوده_ 1287ه _والبره_1288ه _وفد عليه رؤساء القبائل يهنئونه , الامسلط بن ربيعان فأنه لم يفد عليه فنقم عليه سعود وأراد ان ينكل به....)).انتهى ص96
السبب الثاني_ ميل الامير مسلط بن ربيعان الى صف الامام عبدالله بن فيصل ..حيث يقول الذكير
(......كان سعود ناقما على مسلط ,لانه كان سابقا يميل الى عبدالله الفيصل , رغم انه لما حصل الخلاف بين عبدالله وسعود تجنب مسلط امورهم ولم يتدخل في شيء منها ولم يساعد أحد منهم ...)) انتهى ص 96
السبب الثالث- أن الدويش ورؤساء مطير حرّضوا سعود على غزو عتيبه , بسبب ان عتيبه قد أخذت بعض حلال مطير السنه الفائته .....وفي ذلك يقول الذكير قاصدا سعود (....وحمله على ذلك _غزو عتيبه _ الدويش ورؤساء مطير ...))انتهى
والدويش هو الشيخ بدر بن شقير بن محمد بن فيصل بن وطبان الدويش
شيخ ال محمد من الدوشان , فقد جمع الشيخ بدر الدويش فرسان مطير من علوى وبريه فرعي قبيلة مطير , وبرز من فرسانهم في المعركه , الفارس بدر بن مشل الدويش , والفارس الشيخ غنيم بن شبلان شيخ اليحيا من الجبلان علوى مطير , والفارس الشيخ سلطان البعّير شيخ الخواطره من الموهه من علوى مطير .
مقدمات المعركه
نبه الامير سعود بن فيصل بالمغزا , وأرسل الى روؤساء البلدان والقبائل , فأجتمع لديه خلق كثير , نعدد منهم 1- مطير بفرعيها علوى وبريه 2- سبيع بقيادة الشيخ فراج بن عساف ابوثنين 3- العجمان بقيادة الشيخ حزام بن مانع بن حثلين 4-الدواسر منهم الشكره بقيادة شيخهم ابن حفيظ .
اما الحضر فمنهم اهل العارض وأهل الوشم بقيادة ابن سدحان والبواردي وأهل الخرج والحوطه والحريق بقيادة الهزاني , واهل الغاط بقياده الامير محمد بن أحمد السديري _خال الملك عبدالعزيز _وأهل القصيم بقيادة الامير مهنا الصالح ابالخيل .
ساروا في ربيع الثاني عام 1290هـ, فلما قطعوا اكثر من ثلثي المسافه , متجهين الى حيث يقطن مسلط بن ربيعان على آبار طلال في عالية نجد , فشاهدهم رجل من عتيبه اسمه سرور الحمادي , فسابقهم يريد ان ينذر قومه ,فوصل اليهم قبل الجيش بليله , فجاءهم باليل (العتيم), وأخبر مسلط بما شاهد , فأمر مسلط أحد عبيده بأن يكبّر النار بوضع جميع الحطب فيها , وأرسل مراسيل يستدعي كبار القوم , فلما حضروا أخبرهم , وقال ان سعود قريب وحروته صباح الغد , وش رايكم , فأختلفت الاراء بين الشديد والهزيمه , وبين الثبوت والعزيمه (وكان من رأي مسلط الثبات , وهذا هو رأيه دائما ,اليس هو مناوخ الحكام؟؟, لكن يريد أن يتفحص عزائم القوم ) فقال فريق آخر : نبي نهزّم البل بليل ونبقى خيل ورجال , وأذا جاء قابلناه اما ننتصر, واما ان انتصر سعود مانخسر الا السوادين (بيوت وغنم).قال الامير مسلط : وش حنا بليا السوادين ,,,هذا ماهوب راي ,,ثم تفقد الحضور وسأل عن صنيتان الضيط , وكان غائبا , فأرسل من يندبه (وكان الضيطه مشهورين الى جانب شجاعتهم , بسداد الرأي )فلما جاء صنيتان , خاطبه الامير مسلط وقال: وش رأيك ياصنيتان , قال صنيتان : الرأي رايكم , قال مسلط : مالقينا رأي ناس تقول ننهزم وناس تقول نواجه بدون مال ,وانت وش رايك ياصنيتان , قال صنيتان الضيط مقولته المشهوره:الرأي (عقال ومبرك وقلب يأوي لهن هدان), يعني عقّلوا البل ونحارب دونها , فقال الامير مسلط: هذا هو الرأي ,أسمعوا يالحضور , الحاضر يعلّم الغايب ,ترى المنع مرفوع , وترى اللي يمنع مسهوج وجهه,قال صنيتان الضيط :قم يافلان وقم يافلان ونادوا فلان وفلان عدّد مجموعه من شباب القوم , قال ياعيال , الحين سعود منّوخ ويبي يصبحّنا , والمتسرقه (المتسللين)من قومه يشوفون نيرانّا , ويبون يحوفون البل والبيوت قبل البيرق , لكن حنا نبغا نكمن لهم , في أسفل الشعيب , ومن جاء منهم ذكيناه , وقطعنا راسه , وحطينا راسه عند رجليه , حتى أذا أغار القوم صباحه , يشوفون ربعهم على الدرب , بهذا المنظر ويرتبكون , ويجفلون ,,ففعل مثل ماقال ..
ثم لمّا دخل مسلط (المحرم )قسم النساء , جاءته ابنة أخته (مضاوي بنت الحميدي الدويش , امها شعاع بنت محمد بن ربيعان , ومضاوي كانت متزوجه من ولد خالها تركي بن سلطان بن ربيعان )وقالت لخالها الامير مسلط : ياخالي أنا طلبت بنات خوالي انني أكون في العطفه الصبح , ورضوا , وانا هالحين طالبتك ايّاها ,فقال مسلط لكي ماتريدين ..
المعركه
فلما جاء الصبح رتّب الامير مسلط جموعه ووضع قبائل مزحم في الميمنه , وطلحه في الميسره , وجعل العطفه في القلب مع مجموعه من شجعان القوم ,فتقدم الامير مسلط وكان عاصبا رأسه بقماش أحمر , ولبس جوخة حمراء , والى يمينه الفارس الداهيه مدوّخ السليح عاصب راسه بخرقة سوداء , وعلى يساره الفارس ذعار بن صلاّل والفارس الجلاوي .
فلما تقدّموا (وكان مسلط على فرس شعلى اللون ,وكان هو في المقدمه , على انه كان كبير السن حدود 70عام , فلما تقدّم سمعت فرسه صوت الطبول , في الجيش المقابل , وكانوا العبيد يقرعونها للتنبيه ولتحفيز الجيش على القتال ..فلما سمعت الفرس الصوت ...(أحرنت ) جفلت ,فلكدها مسلط بقدمه , وقال والله لتلكدين ,( ما مروعك الا عبد يقرع له شن),.........فتقدم وصاح , الآد روق ياعيال أبوي , اليوم يومكم , عوايدكم .......علااااااااااهم , والله أكبر .
ثم فزعت الخيل بالفرسان , وأشتبكت الجموع , وبدا الغبار وريح البارود
وصهيل الخيل وقرع السيوف وأصوات العزاوي
وانغمس الجمل بالعطفه في وسط الميدان , وخرجت
البنت (مضاوي) وحذفت , شيلتها وفرعّت , وصاحت وهي تبكي ...
(عليهم يالاد روق عليهم يالاد روق ,,هوشوا هوشوا ,,عسالكم تالي ..عسا لكم تالي ..).فانتصروا على انهم أقل بكثير من جيش سعود
يقول المولى عز وجل في محكم التنزيل ((....قال الذين يظنوا انهم ملاقوا الله كم من فئة قليله غلبت فئة كثيره بأذن الله والله مع الصابرين ))آيه 249 سورة البقره.
قال الاستاذ أحمد عطّار في كتاب صقر الجزيره ج1 ط2 صفحه 76. بعد ان تحدث عن حكم سعود .((.....وأخيرا ضعف شأنه حتى قام عليه رجال عتيبه تحت أمرة زعيمهم مسلط بن ربيعان , بأعمال النهب و السلب وونهبوا الجانب الغربي , من الرياض فخرج اليهم سعود , وتقاتل رجاله مع رجال مسلط ,قتالا شديدا ,ذهب ضحيته ,كثير من المخلصين لسعود , واصيب هو نفسه , بجرح بليغ الزمه الفراش مده وكان ينغر عليه ويخرج منه الدم فمات من أثره عام 1291هـ..))انتهى
يقول المؤرخ ابن عيسى واصفا شراسة المعركه , وعدد من قتل فيها (....فحصل بين الفريقين قتال شديد , وصارت الهزيمه على سعود بن فيصل , ومن معه وقتل منهم خلق كثير ....))
من مشاهير القتلى الذين ذكرهم
1-الامير سعود بن صنيتان ال سعود
2- الامير محمد بن احمد السديري امير الغاط وخال الملك عبدالعزيز.
3- عبدالعزيز بن احمد السديري خال الملك عبدالعزيز.
4- الامير علي بن ابراهيم بن سويد امير جلاجل
5- الامير فهد بن سعد بن سدحان امير شقراء
6- سعد بن محمد البواردي من كبار اهل الوشم
وغيرهم كثير .
يقول الفارس الشاعر سهّاج بن غلاب بن ربيعان , واصفا المعركه:
جانا النذير سرور وسعود جا اليوم=يقدى الجموع الضاريات المهيلـه
وبدبرت الله راحوا اشتات وقسـوم=عقبان نجد أهل الفعـول الجليلـه
بدر الدويش اللي من العام مسموم=مبطي يحايلنا علـى كـل حيلـه
ماخلقت الدنيا ولا الدين في يـوم=واللـي يتمنـى حربنـا نعتبيلـه
يوم من الجمعه على هلة التـوم=عج الرمك كنه عجـاج المخيلـه
اولاد روق اللي كما دولة الـروم=امرويه حدب السيـوف الصقيلـه
ومركاضنا من عقبه الجمع مثلوم=ولبس الحداد اللي ينقّـض جديلـه
ومن طاح لا راحم ولاهوب مرحوم=بموصـلات بالعـروق الطويلـه
والكبد ماذاقت من الـزاد مطعـوم=ليـن أقتفتهـم خيلنـا فالدبيلـه
وياطير ياللي فالسما تكثر الحـوم=عان السدارى روسهم فالمسيلـه
وفهد ولد سدحان في مذبح القـوم=وراع الرويضه مالقى من يشيلـه
الذبـح تسعميـه وزود بلمـلـوم=عود من الروسان ربـي مزيلـه
وراك يالملوم تخمر مـع القـوم=ماجا من الله مامعي فيـه حيلـه
******** type="****/**********">doPoem(0)***********
كذلك قال الفارس الشاعر شليويح العطاوي عدّة قصائد لكن أشهرها , (آوي )
يقول المؤرخ العبيّد في مخطوط النجم اللامع , في صفحه 297 بعد ان تحدث عن تفصيل المعركه :
((...وتشهد بشهرتها , قصيدة شليويح العطاوي , كما شهدت , قصيدة عمرو بن كلثوم لبني تغلب في وقعة خزاز , مع اليمانيين .....)) انتهى
والقصايد سوف تأتي تباعا
وهذه هي القصائد :
هذه مجموعه من قصائد معركة طلال الكبرى 1290هـ
القصيده الأولى وهي لشليويح العطاوي والتي
وصف فيها المعركة وهي :-
ألا يالله تغفـر لـي ذنوبـي=تغفـر لـي ذنوبـي والآثـام
كما إنـي ماتقفّـى الغافليـن=ولا أسـب الأجاويـد الكـرام
هجدنـا النذيـر بهـود ليـل=وحنـا هاجعـيـن فالمـنـام
والشردان أشـاروا بالرحيـل=والظفران أشـاروا بالمقـام
وأقمنـا وبنّيـنـا البـيـوت=وكلاً دونهـا لبـس الحـرام
يوم سعـود جانـا بالدويـش=جاب مطير مع صبيـان يـام
وأهل سدير والسبعان معهـم=والعجمـان يقداهـم حــزام
والقصمان جونا مـن يميـن=يبـون المبانـي والجـهـام
والـدمـام دقــوّه العبـيـد=ونور الشمس غاطيه الغمـام
وشافونـا وجونـا سارحيـن=والله مانـوونـا بالـرحـام
ولجّـن العـذارا بالصـيـاح=شافن الجمـوع الهـا ادحـام
ورمـن البخانـق والهـدوم=وينخّـن بالجـدود وبالأسـام
وردينـا لدهمـان الفرنجـي=وحد الشلف كاسرت العظـام
ومركـاضٍ يسـر الناظريـن=ترعابـه مرودمـة السـنـام
لاتبكـن يابيـض النـحـور=عان الفعل فـي ولـد الأمـام
دون البل مكرمت الضيـوف=بعنـا الـروح بيـع مايسـام
والا يانديبـي فـوق عـوب=فوق الهجن عجـلات الـولام
خلّن العلـم عنهـن جنـوب=وهنـه كنهـن ربـد النعـام
يلقـن البـيـوت مبنـيـات=سـود كأنهـن روس القـدام
وأول مايواليـهـن عـقـاب=بن شبنان والربـع الحشـام
ويلقـن الـدلال مساطـرات=ويعبـى كيفهنـه بـالـولام
ويلقـن الصحـون ممليـات=وأذناب الكبوش إلهـا إيـدام
سلملي علـى آلاد الكريـزي=حمول الخيل مرويـن الحيـام
سلملـي عليهـم يانديـبـي=وخص عقاب حمّاي الجهـام
قل لولا الحب والرفوان فيكـم=لقنّع بوشكـم حمـر العسـام
لجازي من طمع في جل ذودي=بفعل يشتهـر شـرق وشـام
لين إن الهبود تشوف فعلـي=وأنا لي كزّة الفـارس غـرام
******** type="****/**********">doPoem(0)***********
ولكن هذه لم ترضي الاميرمسلط بن محمد بن ربيعان حيث قال لشليويح فعلنا اكبرمن هذه القصيدة وهذه قصيدتك في ابلك التي خذوها ذوي خضيرمن المقطه في لوم فقال شليويح قصيده ثانيه قال فيها :-
جانا النذير عصير مـرذي الفطايـر=سرور شوق اللي حوى الراس بقران
يقـول جاكـم واحــدٍ مايسـايـر=طاغي وظالم مانوى فيكـم إحسـان
سعود جاء من يمـة الشـرق فايـر=بصبيان يـام مرجحـة كـل ميـزان
ومعهم هل العارض وسبع الجزايـر=ومعهم بريه وغيرهم جمـع دوشـان
وردّوا لـرأي مدرّبيـن البصـايـر=وقلنا على الله مانبا غيـره أعـوان
وسقنا لهم جمـعٍ يشـوق النظايـر=موحديـن اللـي ليـا وحّـد اعـان
وبعد صـلاة الصبـح والعـج ثايـر=لين اتقى خشم النجج عقـب مابـان
وخيلٍ نصـت خيـل وخيـلٍ تخايـر=وخيلٍ مرزنّها غنيـم ابـن شبـلان
كنه ليا اعرض في وجيـه الجرايـر=يمنع هذولا عـن هـذولا بقرعـان
وراحوا لنا مـع دبـرت الله نحايـر=عقبان نجد اللي يقـدّون الأضعـان
جو بالجرايـر وأنكفـوا بالخسايـر=خسايـرٍ ماتنتـعـوض بالأثـمـان
والله مـا اذم متيهـيـن العشـايـر=لكـن ضاموهـم عطيبيـن الأكـوان
الـدم سايـل فـي وجيـه الكسايـر=وراحت سربهم كنها جـول غـزلان
ياراكـب اللـي كنـه الهيـق ذايـر=وليا عطا دوا الخـلا يقـرن أقـران
ليا جيـت برقـا خصهـم بالبشايـر=قل إرجعوا لدياركـم هـي الأوطـان
برتوبـنـا ياذاهبـيـن الحظـايـر=وحنا ذراكم يـوم زوغـات الأذهـان
راح العصيمـي والخيوطـي يذايـر=وضعونهم وصلن جاحـد وسقمـان
وحنّا خدمنا اللي من ورا العرض ناير=بأولاد روق مطوعـة كـل فسقـان
بدهم الفرنجي مـن حـداد الذخايـر=وحدب السيوف اللي يقصن الأمتـان
ومسلط كما حرٍ مـن الوكـر طايـر=صيده نهار الكون ذربيـن الأيمـان
عسـى يمينـه ماتجيهـا الجبـايـر=يمنىً ترّوي فالملاقـى شبـا الـزّان
والحضـر واللـي ياكلـون البرايـر=غدو شتـاتٍ عقـب ماهـم بخـلان
افـرج لنـا الله مـن أمـورٍ كبايـر=الله ولافزعت عقـاب إبـن شبنـان
******** type="****/**********">doPoem(0)***********
وكذلك لم تنال هذه القصيدة اعجاب الاميرمسلط بن محمد بن ربيعان وعاتب شليويح عليهاحيث ان فيها نوع ٍمن العتاب لبعض لقبائل عتيبة التي لم تحضرالمعركة و بعد ذلك قال سهاج بن إربيعان قصيده يقول فيها :-
جانا النذير سرور وسعود جاء اليوم=يقدا الجموع الضاريـات المهيلـه
وبقدرة الله راحوا إشتات وقسـوم=عقبان نجد أهـل الفعـول الجليلـه
بدر الدويش اللي من العام مسمـوم=مبطيٍ يحايلنـا علـى كـل حيلـه
ماخلقت الدنيا ولا الدين فـي يـوم=واللـي تمنـى حربنـا نعتبيـلـه
يومٍ من الجمعة على هلّـت التـوم=عج الرمك كنّـه عجـاج المخيلـه
سقنالهم جمعٍ من الغيض مزحـوم=مثل الخيـال اللـي ثقيـلٍ مخيلـه
ألاد روق اللي كمـا دولـة الـروم=مروية حـدب السيـوف الصقيلـه
مركاظنا من عقبه الجمـع مثمـوم=ولبس الحداد اللي ينقّـض جديلـه
ومن طاح لاراحم ولاهـو بمرحـوم=بموصـلاتٍ بالعـروق الطويـلـة
والكبد ماذاقت من الـزاد مطعـوم=ليـن إقتفتهـم خيلنـا فالدبيـلـه
ياطير ياللي في السما تكثر الحـوم=عان السـدارا روسهـم فالمسيلـه
وفهد ولد سدحان في مذبح القـوم=وراع الرويضه مالقى مـن يشيلـه
الذبـح تسعميـة وزود بلمـلـوم=عودٍ من الروسـان ربـي مزيلـه
وراك يالملوم تخمـر مـع القـوم=وما جاء من الله مامعي فيه حيلـه
******** type="****/**********">doPoem(0)***********
وقال سهاج قصيده ثانية لايحضرني منها سوى أربعة
أبيات وهي
هاضتني جموع المسلميـن=جونا مثل عمدان الجرادي
جونا من يسار ومن يمنين=والدمام من صبحه ينـادي
يالله ياشفيـع المؤمنـيـن=روس الحضر نطلٍ فالمنادي
خل العرب جرعات الحنين=ترعى من طلال ليا الثنادي
******** type="****/**********">doPoem(0)***********
وجميع هذه القصايد لم ترضي الامير مسلط إبن ربيعان
وطلب من الشعراء قصيده أفضل .
فقال شليويح العطاوي قصيده أرضت الامير مسلط بن ربيعان
وأرضت جميع عتيبه لانها تناسب الحدث
القصيده الكبرى :
أول كلامـي طلبتـي ذكـر الله=ماني عن الرب الكريم غنـاوي
أغفر ذنوبـي يامحـل ذنوبـي=إن كان في بدع كلامـي غـاوي
ماني بمن يمدح بقـول لسانـه=ولاني على عشق البنات هواوي
على طلال الصبح خلت مخيلـه=تاصل مناينهـا ليـا الجـرذاوي
وبروقها الهند ومصاقيل العجـم=ورعودهـا البـارود والعـزاوي
وتمطر بعطشان المحبب والقنـا=والها بروس الخيّريـن تعـاوي
جانـا سعـود مسيـرِ بجنـوده=معه الدويـش ولمّـة البـداوي
ومعه جموع سبيع وأهل العارض=وصبيان يام وبيرق القصمـاوي
ثمانيـة آلاف عـداد جموعهـم=بلـوى وربـي يدفـع البـلاوي
وحنّا ثمانميـة عـداد جموعنـا=ماش أجنبي فينـا ولا برقـاوي
ألاد روق اللـي عديـمٍ رايهـم=لاجاء مـن الحكـام رد بـراوي
نبب عيلنا شيخنـا إبـن محمـد=ثم إنتهض مثل العقاب النـاوي
عودٍ تعصب في ظهـر جلومـد=جلومدٍ مثـل القضيـب الهـاوي
مترفعـاً عنهـا اللحـم بعلوّهـا=شعلاً شعـاع شعّلـتٍ شعـلاوي
وصحنا عليهـم ثـم عاونـا الله=لين إنها صـارت لنـا منـاوي
ياضفرهـم لاقـرب الله دارهـم=وحنّا عليهم مثـل نجـمٍ هـاوي
لكن سربتهم ليـا اوجهنـا بهـم=شـراد ريـمٍ مـع حمـادٍ داوي
ولكن سربتنـا ليـا اوجهوابنـا=زمولٍ مخزمتٍ علـى الكـراوي
ولكن شليل الخيل قـدم نحورنـا=صيد الخلا معطٍ مـع القـراوي
وطلحه نحو عنّا بريه يسارهـم=وتعاقبوا دهم العـروق هـداوي
كنّ الجنايز في نحـاوي طلحـه=جدع الخشب فالوادي السنـاوي
وحنّا تلاقينـا بسربـة علـوى=وساع الطعون مطوعين الغـاوي
ونخيت مزحم سعد منهـم ربعـه=يوم اللقاء زادوا ورى الهقـاوي
ردوا يمانيهـم لكـل مـجـرب=و ياما خذوا من روح كل مساوي
نضرب بسلات الهنادى روسه=ـمونقسم مثانيهم ماهي بسطـاوي
ونرخي عليهم حد كـل موصـلا=وفي فعلها يحتـار كـل مـداوي
وارويت مذلوق القنا من خيلهـم=لين ادبحـو شرابـة القهـاوي
ومنعت سلطـان البعّيـر بينهـم=وشيوخ ماصدوا لهـم نحـاوي
يارب تنجيني وتنجـي سابقـي=اللـي تّزبنـي عـن الأهـاوي
مايلحق العنّـان هومـة راسهـا=ياكود يركيها علـى السنـداوي
حزمبرٍ كـن الحـزوف بطيهـا=ولاثيـاب الـبـز فالمـطـاوي
مضرب يداها في صليب الرّقّـه=تأخذ من أدنى الحزم كبر الشاوي
قباً مـن الزلبـات وافٍ عدهـا=بنت الأصيل وركضها فجحـاوي
أبّرهـا وأم العـيـال تبـرهـا=تشرب حليب الفاطر الجنفـاوي
وتطلعن يالبيض فـي مركاضنـا=وصلـت كسايرهـم للجـرذاوي
عزي لهم لولا اسمر في خيلهـم=يهوي علانـا هوايـة النـداوي
ولارحم ابو من صد عن محرافها=يوم إنقلاع الستر عن مضـاوي
نطعن لعين اللي تهـل دموعهـا=تبكي وفي تالي البكـاء نخـاوي
تقول يالظفـران مـن عاداتكـم=هوشوا عسى يبقالكـم شـلاوي
ونطعن لعين اللي تجـر حنينهـا=عفراً تبـى صيفيـة المطـاوي
قلت ابشري بالفك ياحـم الـذرا=دام الطعـن يفـك والأهــاوي
ترعابنا جـرد الرقـاب وتنثنـي=ماحدرت حسله ليـا الحجنـاوي
والمدح لله ثـم لنسـل محصّـن=عسى لهم عند الإلـه عـراوي
كم طلّقوا مـن جـادلٍ رعبوبـه=جرت على مضنونهـا النعـاوي
وذوي ثبيت أهل المناخ شيوخنا=هل العطف والمنزل المتسـاوي
سوّاقة المغتـر علـى الحرّابـه=يوم الحريب عن الحريب يلاوي
ياحايف الفنجان عـدّه لمـدّوخ=واثنه لأبن صـلال والجـلاوي
وانا زبون الحرد ابو ضيف الله=ليا كلّح الشارب عن الشفـاوي
مايعذرب الرجـال عـدّ أفعالـه=ولاني بجّماع الهـروج هـذاوي
وأنا أحمد الله يوم أنا من لابـه=مهوب من قصّار البتوع شواوي
******** type="****/**********">doPoem(0)***********
ــــــــــــــــــــــــــــــــــــــــــــــــــ ـــــــــــــــــــــ
مناخ ( دلعة ) بين برقا من عتيبة واهل الجنوب
ذكر ابن خميس في كتابه معجم جبال الجزيرة , الجزاء الثالث , صفحة 163 , وقعة بين قبيله عتيبة بقيادة الشيخ عقاب بن شبنان بن حميد من جهه , وقبيلتي قحطان والدواسر من جهه , قرب مكان يقال له سناف الطراد بالقرب من هضبه تيما جنوب هجرة الشعراء , وقد استمر بينهم الطراد على الخيل لعدة ايام انتصرت فيه عتيبه على قحطان والدواسر , وقتل من الدواسر عدد كبير.
كما اورد هذه الوقعة صاحب كتاب:
المعجم الجغرافي للبلاد السعودية , عالية نجد , القسم الثاني , من حرف ( خ - ظ ) , تأليف سعد بن عبدالله بن جنيدل , ص 708 , وذكر انتصار عتيبة على قحطان والدواسر , وقتل عدد كبير من الدواسر.
وهذه الوقعة تسمى (( دلعة )) , وقد ذكرها مخلد القثامي عندما عدد بعض وقعات عتيبة , وقال:
والفصل جا فاربع سنيـن مسمـاه=من عقبها سموى القبايـل طنينـي
منها النهار اللي على الضال واقصاه=من عجه الضلعـان عيـت تبينـي
ومنها نهار فوق (( دلعه )) عبيناه=مع ايسر الهضبه عساهـا سنينـي
وعلى طلال الـدم الاشقـر نثرنـاه=يومنهم جونا الضحـى سارحينـي
******** type="****/**********">doPoem(0)***********
وقد اورد القصيدة , صاحب مخطوطة النجم اللامع للنوادر جامع , وهي اطول من ذالك
والحاضرين من عتيبة (( برقا )) فقط , وقد جسدها الفارس والشاعر مشيلح بن رويبح الفرهودي الشيباني , ووصف المعركة واطرافها.
يقول الفارس مشيلح بن رويبح الشيباني:
بديت ذكر الله علـى اول كلامـي=على المقام وهجعتي فـي المنامـي
الـروح لابـده محـل الاثـامـي=ومانفعلـه يالله تكفينـا سبايـبـه
انا على المعبـود علقـت عانـي=ولاني بعارف غيبها فـي زمانـي
ادخل على الله من حوايـم لسانـي=وياخالق روحـي تهـون عذايبـه
قلته وانا مبداي في راس منـواع=في في راس رجم للهبايب وملواع
بديـت حيـد للشياهيـن ميـقـاع=عسى صدوق الغيث يسقي شعايبه
طرى على قلبـي مبـادي ركونـه=لوكان مايبديـه سحـاب يشونـه
سقـاه رواح الحيـا مـن مزونـه=يازين عند العصر مبـدا شذايبـه
رديت لـي قـاف حسيـن البنايـا=مـا ولفـوه مكثـريـن الحكـايـا
احلى من البرني بـروس الودايـا=ينشـط اللـي كاثـرات تعايـبـه
حلو سواة الـذوب وسـط الخليـه=يقري منـه لوكـان ربـع الوقيـه
يبري الكبود اللـي بهـن الشكيـه=من الصيف جانيه النحل في جنايبه
طاراً طرى في خاطري كل طـاري=هوجاس عنها اللاش ماهو بـداري
ذكرت لي يوم جرى منـه جـاري=ادرك احد واحد نجا مـن كرايبـه
لا يانهـار جـا عليـنـا ومـنـا=نؤه غطـى روس الاقاذيـل عنـا
واحـد درق فـي غيبتـه ماتمنـا=يشـق للقـب المفقـه رعايـبـه
خيل خيالـه يـم خشـم ذهلانـي=من دون دلعه فرع قصـر الادانـي
روق ورقرق حـول ذاك المكانـي=ورنت رعوده في ستايـم سحايبـه
برقه سيوف الهند ورعوده الـروم=وثعله غلب عود من العج مقتـوم
وسيلـه حمـر دم وربانـه لحـوم=وبرقة قطع وصل المحبب حبايبـه
جونا هل الجنـوب لحاسـة الـدم=وشيوخهم تقدى الجمـوع المـردم
واللي يبـا التوخيـر قالـوا تقـدم=وكل جمع قومـه وجمـع حظايبـه
وكل لبس لـه لبسـة يـوم عنـي=وخيـل بخيـل بيننـا روحـنـي
اقفـن بالفرسـان ثـم اقبلـنـي=كم من صبي تقلعـه فـي غرايبـه
جونا كما سيل نحـى مـع مسيلـه=اللي مـع الجرعـا يحـده قفيلـه
مـن جاهـز نـؤ الثريـا مخيلـه=وحنـا كمـا نـؤ يمـزع هبايبـه
بالكثـر راعونـا وحنـا نروعهـم=وجموعنا قرت وقـرت جموعهـم
ياشوف عيني يوم قمنـا نلوعهـم=بصافي الحديد اللي دقـاق رقايبـه
جوهـم عزاتـي للمنـى مناعيـر=والخيـل مردمـة علينـا طوابيـر
ولجة عزاوينـا سـواة الحداديـر=يوم اشهب البارود ثارت حطايبـه
ربعـي مرزنـة القلـوب الشفاقـا=برقا هـل العـادات يـوم الملاقـا
اهل المواقف يـوم يبـس الرياقـا=يوم التمـام السـو تدنـي قرايبـه
نـادى علينـا شيخنـا بالحمايـل=قـام ونخانـا بالجـدود الاوايــل
يقول هوشوا هوشة اهل الصمايـل=والروح بخطوط القلم فـي كتايبـه
قمنـا وسبلنـا غوالـي العـمـارا=ماعندنا في اللـي يجيهـا مـدارا
نبيعها في سـوق بيـع الخسـارا=سوق مذاريـب النشامـى جلايبـه
ياغافل عن عصـر هـاك العشيـه=ليتـك تحلـى عـزوة لـي دنيـه
يوم اصطفاقـات الجمـوع القويـه=في يوم ضيـق مبهمـات نشايبـه
يوم اعتـزوا عليهـم الاد شيبـان=راحوا كما صيد من الجـو شتـان
والهوش منهم ضيعه كـل ديقـان=وكل نسى فتنـه ومنـزل قرايبـه
الهوش مع شيخاننـا عـادة لنـا=حريبنـا مـن حـدنـا ماتهـنـا
مـن همنـا مايمـرح الليـل منـا=يسقى من السم المـدرق شرايبـه
نادى لنـا عنـد الالـه المنـادي=مدبـر الساعـات والـي العبـادي
وقمنا عليهم مثل حـوم الحنـادي=شعيبهـم بالـدم تنبـت عشايبـه
والاد عاصم مع عيـال المروحـي=جمع لهم يـوم التراييـح روحـي
حدوا سعد علـى طويـل ملوحـي=أبوي لا لاهم لـزوا فـي زرايبـه
الاد عاصـم محكميـن الحـرابـة=وافعولهم من يوم عصر الصحابـة
طريحهـم قعـد عشـى للذيـابـة=تاكـل عصابينـة وتاكـل ترايبـه
اسيوفهـم يـوم الحرابـه تسلـه=تشيل راس اللي خصم مـن محلـه
ياسعد من هم باللقاء فزعتـن لـه=خصيمهم قفـى وكثـرت مصايبـه
الاد الفليحي يقصـر الـذم عنهـم=ربع ليـا ركبـوا تقضـوا دحنهـم
كم سابق صوب ظهرهـا طعنهـم=علـم اليـا قلتـه توثـق حقايبـه
على الخيـول ارماحهـم علقوهـا=وكم سابق عن جريهـا عوقوهـا
وكم جادل مـن شوقهـا طلقوهـا=غير الصويب اللي تجدد عصايبـه
ربع على ايسرنا خذوهـم طيـارا=كـل يعايـن فعلـهـم بالـقـرارا
في دربهم ياكـن جضـع السكـارا=جثايـا هشيـم دانيـات حطايبـه
الاد الكريزي لابعد الـرب دارهـم=ربع اليا ركبـوا تقاطـى مهارهـم
كم من صبي طايـح فـي كرارهـم=سرواله التومـان شقـر ذوايبـه
الله معاضدهـم بحـظ وسـعـاده=والهم على كسب النواميس عـاده
كم فارس في نجـد كبـوا شـداده=غدا عليـه الذيـب يقنـب قنايبـه
ومسلط على اليمنى حكم له جموعي=لباسة الجوخ الحمـر والدروعـي
يبا قفـى جمـع علينـا يفوعـي=ظاري بركضـات تقطـع عقايبـه
حكمه بعيد ومحتـض لـه حضيـة=حكلـه بعيـد ولادري عنـك نيـة
والله قضاها ساعـه فـي شويـة=مثل الطليب اليا خلص عن طلايبـه
******** type="****/**********">doPoem(0)***********
المصادر
1- ذكر ابن خميس في كتابه معجم جبال الجزيرة , الجزاء الثالث , صفحة 163
2- المعجم الجغرافي للبلاد السعودية , عالية نجد , القسم الثاني , من حرف ( خ - ظ ) , تأليف سعد بن عبدالله بن جنيدل , ص 708
ــــــــــــــــــــــــــــــــــــــــــــــــــ ــــــــــــــــــــــــــــ
وقعة ( مواجه ) جبله بين عتيبه وقحطان..
وقعه مواجه بين... عتيبه بقيادة الامير تركي بن حميد
وقحطان ....... بقيادة الامير محمد بن هادي ..
مقدمه بسيطه .للامير تركي بن حميد.
الامير الفارس تركي بن حميد ..اشهر من علم على راسه نار ..
كتب عنه احد المؤرخين ..انه جمع بين الفروسيه وبين الكرم وبين الشعر والدين والوفاء بالعهود والمحافظه عليها وبين الشيمه ونزاهه العرض ويعدل ذلك كله هو التوحيد الخالص فهو من خيار الرجال رحمه الله ..
واستطرد ذاكرا ...ان الامير تركي بن حميد كان يزاعم قحطان وحرب ومطير فلا يخاف ولايكترث من اعداءه ولو كثروا..
وذكر ايضا ..ان اتاه من بن رشيد منجوب يرد البرا عليه وفي اليوم التالي اتاه منجوب اخر من الامام فيصل بن تركي ال سعود يرد البرا ..(رد البرا..هو اعلان الحرب) ..وكلا الحاكمين تعاهدا على حرب عتيبه وابعادهم عن نجد وردهم للحجاز الذي اتو منه ..فتمثل الامير تركي بن حميد يخاطب فرسه من قصيده له
ياسابقي شفت النكر والهوايـل=ولابد من يـوم تراسـل دميـه
من نقرة العارض الي باب حايل=تعاهـدو مابينـهـم بالحمـيـه
بالعون جتنا من عزاز الحمايـل=حكام نجـد القطـع الصيرميـه
******** type="****/**********">doPoem(0)***********
لكن هيهات ..ان تزحزح عتيبه وفي ذلك يقول مخلد القثامي
حنا اهل نجد وبسيوفنا ملكناه=وغابت شموس اهله الاوليني
******** type="****/**********">doPoem(0)***********
اسباب الوقعه ونتائجها..
كان الامير تركي بن حميد صديقا للشريف ملك مكه وهو الشريف عبدالله وكان بينهم روابط صداقه ...
وكان يوجد عند الامير محمد بن هادي شيخ قحطان المشهور حصان من اصايل الخيل ومشهور عند البوادي كلها واسم الحصان (حرقان)
وسبق ان طلب احد الاشراف من بن هادي بيعه ..فرد بن هادي بقصيده نورد منها
يالعبدلـي لاتكثـر السـوم بالغـوج=لو كان طارينا الثمـن كـان بعنـاه
شفي عليـه بـردة والغلـب عـوج=ان حـل بنحـور السبايـا مثـاراه
وان لجلج المجمول فوق الحني عوج=ذهل الغطا واهل الرمك قـام تنحـاه
تناطحوا وأوقف على لزمل عمهوج=من شح في عمره عسى الخيل تاطاه
******** type="****/**********">doPoem(0)***********
وكان للشريف عبدالله بن عون مرابط للخيل الاصايل ويعتني بها ..فارسل للامير تركي بن حميد كتا ب ..يقول فيه استحصل على حصان محمد بن هادي المسمى ( حرقان ) باي وسيله تكون ...وكان الامير تركي بن حميد حينما اتى اليه النجاب على ماء شبيرمه الماء المعروف ..وكان محمد بن هادي صاحب الحصان المذكور على (مواجه) الماء المعروف بشعب جبله .. فركب الامير تركي بن حميد وركب معه خادم الشريف ليرى صدق مايقول فطلبه منه تركي بهذه الصفه فكان جواب محمد بن هادي ان قال لتركي بن حميد (ادخل رعاك الله والله كل رجليه العسكري عن ظهر حرقان ..انت تبيه ياخو شرعا لنفسك فانت خذ حبله ..وان كان انت تبي تعطيه العسكري فانا معي راسي وانا بوهادي ... وكان بين بن هادي والشريف عبدالله حزازات بالنفوس ...فكره مقاله تركي وكان يود ان خادم الشريف لم يكن معه حاضر المجلس ...فقنع الامير تركي بن حميد ورجع الى اهله واخذ بخاطره على الامير محمد بن هادي وكان يتحيّن الفرص فلما سنحت الفرصه واجتمتعت عليه عربانه ارسل الى محمد بن هادي يرد البـــــرا عليه ..
فاغار بمن معه من قومه على محمد بن هادي وكان جل مقصود تركي بن حميد ان يقلع الحصان ويهديه على الشريف اجابه لطلبه فلما تطاردت الفرسان وكلٍ علق ريحه بظهر قرنه ..نظر تركي واذا حرقان والذي تحت محمد بن هادي يطارد عليه ولم يود قتل محمد بنفسه ..فهّم بقتل الحصان فارخى العنان قاصدا محمد بن هادي فلما قرب منه قال يامحمد الرمح انطلق من يدي ولا املكه ..فاختر يكون فيك ولا في الحصان ..فقال بالحصان ياخو شرعا فنهض الحصان فقتله ..واستاقوا عتيبه ماخذوه من الابل ....
المصدر العبيد..مخطوطه النجم اللامع للنوادر جامع
ــــــــــــــــــــــــــــــــــــــــــــــــــ ــــــــــــ
معركة سناف الطراد والبديعه
قال أبو عبدالرحمن بن عقيل : في كتابه ديوان الشعر العامي بلهجة أهل نجد روينا عن كتاب صحيح الاخبار لابن بليهد يرحمه الله قال حدثني عثمان الهاجري أمام مسجد محمد بن هادي بن قرمله قال كنا مقيمين
في فيضة وادي أراط في العتك أيام الربيع فجاء في يوم واحد خمس من الخيل هدايا كل فرس واحده مع وفد يطلبون الجوار والامتداد في نجد .
قال عبدالرحمن : وهكذا كانت سيطرة قحطان على براري نجد . وقال الهاجري وكنا عند المضباعه أيام الربيع فجاء تركي بن حميد وأناخ عند أبن هادي يطلب الجوار روينا عن أبن بليهد يرحمه الله في صحيح
الاخبار : حدثني فراج بن طويق الحافي : كنا مع سلطان بن ربيعان _ شيخ الروقه_ في حوى كشف واتينا ابن هادي على ماء الشعراء ومعنا جيش وخيل وهدايا نطلب منه الجوار فقال لنا : انتم في وجهي
ارعوا حيث شئتم الا جبل النير : من دخله فهو خارج عن الامان .
قال ابن بليهد : وظني ان هذا الاعرابي يخشى ان يدخلوا الجبل فلا يخرجوا منه
ولكن ابن بليهد يذكر ان ابن هادي اختلف مع عتيبه وكانوا يخرجون انذاك من تهامه والحجاز كأرجال الجراد ومن استوطن نجد لم يرجع .. وكان رئيس برقا تركي بن حميد ورئيس الروقه سلطان بن ربيعان
وكان تركي بن حميد رئيس عتيبة في معاركها مع قحطان .
ومن المعارك التي خاضتها عتيبة بزعامة تركي بن حميد معركة وقعة سنة 1269هـ ,ضد ابن هادي وجماعته , وكان النصر لعتيبه . بوادي الشعراء قال ابن بليهد : وفي ذلك الموضع سناف يسمى اليوم
سناف الطراد لعظم تطارد الخيل فيه ولم يسمى بهذا الاسم الا بعد تلك المعركة .
وفي اول عهد تركي كان يقيم مع جزء كبير من( عتيبة ) في الحجاز واذا طاح الربيع طلبوا الجوار من محمد بن هادي شيخ قحطان في نجد وربما من والده هادي مدة الربيع واذا انتهى الربيع عادوا الى الحجاز
وفي احدى السنوات لم تمطر السماء الا متاخرة فارسلت عتيبة هداياها الى ابن قرمله ورحلت متوجهة الى نجد حتى توغلت الى قرب سجا وحينما قدمت الهدايا سأل أبن هادي المندوبين أين عتيبة؟؟
فقيل له عن موضعهم فغضب ورفض الهدايا وطلب عودة القبيلة الى الحجاز ومن ثم أرسال الهدايا وطلب الجوار ..عز ذلك على تركي وركب بنفسه وذهب الى ابن قرمله .
(وعندما وصل الشيخ تركي للشيخ محمد بن هادي اذا بزوجة الشيخ محمد واقفه خلف ارواق البيت وشاهدت الشيخ تركي عندما دخل على بن هادي ) وعندما خرج الشيخ تركي دخلت زوجة الشيخ محمد فقالت له وراك ماعطيت بن حميد مطلوبة فقال اعجبك فقالت لا لكن الرجال جاك تسحب جوخته ثم قام من عندك جوخته الى نصف ساقه والله انه يصحبك بالخيل
وحينما عاد الى قومه اجتمع اليه امراء القبيله وتشاور معاهم وكان الراي الاخير هو الحرب فأرسل الشيخ تركي واحد من فرسان عتيبة للشيخ ابن هادي وحمله هالقصيده وهي رد نقا وتبليغ بالحرب
ياراكبن من فوق بواجة الخلا = من البقل ما بانت مواري فطورها
زعولن من الراكب جزوعن من العصا = خطر على فزاتها قصم كورها
ركابها من ربعنا خابرينه = دليلة الظلما إليا غاب نورها
انص (ابن هادي) ريف هشالة الخلا = ريف الهجافا في ليالي عسورها
في مجلسه تلقى علومن طرايف = وحيل تطاها كل يوم قدورها
قل له طلبنا الصلح منكم ولا حصل = دنياك مايبقى بها الا صبورها
وترى الحرب سقم العين ماهو بـ راحه = تسهر ويقزي نومها عن حجورها
وإليا حربتونا فحنا حريبه = ماحن بشيان قصارن شبورها
تضدوننا بالكثر ، وحنا نضدكم = بأكوان منا ما تجبر كسورها
نقفي وحنا عيننا في حريبنا = نعقب لهم نمرا تعاقب سبورها
ونرد سرحات الخلايع مشايع = كبار القفاير نابيات ظهورها
إما نوافق غرة تـتـفق لنا = والا مقابيـس تقسـم شرورها
يرجا لفزعتنا إليا جاء كميننا = بدهم الفرنج اللي وساعن قرورها
كرامة للي تشوق لحربنا = لو انتحوا عنا بعيدن نزورها
وما أذمكم ياربعنا نعمن بكم = انتم سباع الهيش وحنا نمورها
وانتم كما ضلعن صبور على الشقا = وحنا حرار في مشاذيب قورها
ساعة تجيكم خيلنا عارفينها = معاريض والا معطيتكم نحورها
وساعة تجينا خيلكم عارفينها = نحد السبايا لين تركب وعورها
كم سربتن دهما دهوم نجرها = تحاكوا بها غيابها مع حضورها
إليا نسيتوها عليكم نجرها = تموتون وانتم مانسيتوا حرورها
تصبح مداس الخيل من غب كوننا = تشبع حناديها وباقي نسورها
ماينفع الا الصدق والفعل والنقا = وباقي الحكايا بايهات أمورها
عاداتنا لطم المعادي على النقا = والا العميلة راتعه مانذورها
******** type="****/**********">doPoem(0)***********
فكان رد الشيخ محمد
ياتركي ابن حميد وان كنت صادق = فارجع بـقومك لاتـولّي دبورها
نجد(ن)تبرّا منك وبنا ترحب = تبدي لك البغـضا ولا طعـت شورها
فإن كان يا بن حميد ماطعت ناصح = ترى الوعد لا من ركبنا ظهورها
فإن كان جمعاكم خذت ثوب راعي = فتر جمعنا ماياخذ الإ ندورها
بني مظيم(ن)وان تولوك ساعة = يشدي ليوم الحشر نفخات صورها
عاداتنا لطم المـعادي على القنا = والإ العميلة راتعة ماندورها
******** type="****/**********">doPoem(0)***********
انشد الشيخ تركي هذه القصيده موجهها للشيخ سلطان بن ربيعان والهيضل
نومك طرب وأنا نومي هواجيس = ماساهرك بالليل كثر همومي
أسهر الانامت عيون الهداريس = بالليل أساهر ساهرات النجومي
أوجس بقلبي مثل دق النحاحيس = الله يلوم اللي لمثلي يلومي
أشوف عدلات الليالي مقابيس = ولاحد من الدنيا عظامه سلومي
تضحك وتخفيلك حفي الهناديس = تفطر لها يوم ويوم تصومي
أعمل وتلقى وأفهم العلم بالقيس = دنياك لو زانت تراها نقومي
قالوا جهلت وقلت جهل بلاقيس = الجاهل اللي مايعرف اليمومي
من لايدوس الراي من قبل ماديس = عليه داسوه العيال القرومي
ومن لايقلط شذرة السيف والكيس = تبدي عليه من الليالي ثلومي
ومن لاياخذ الدنيا بميز وتقييس = مثل الذي يسبحر بحر يعومي
القصر مايصلح على غير يأسيس = ومن لاتعلم ماتسر العلومي
واليا توافق مشى ورى السو وأبليس = تدر منه وستر ربك يدومي
كل القلم من كتبنا بالقراطيس = واركابنا من كثر الاذلاج تومي
ولاخير في كثر الحكا والتماليس = هرج بلافعل يجيبه وهومي
والعز فوق معسكرات السواديس = اليا قصدت اللي بالاشيا رحومي
قب تنازا بالنشاما كراديس = والطير في روجاتهن يحومي
بالليل أصالي حاميات المحاميس = والصبح أصالي كل قب قحومي
أربع سنين ودمع عيني أماريس = العين تسهر كن فيها هزومي
واليا ركبت معالجات المضاريس = يبرد على قلبي لهيبه سمومي
صوابنا بالميل عمق اليا قيس = وطريحنا في مثبره مايقومي
ان جن بنا مثل النعام الاماريس = لاخف عقل مع رقاق الحزومي
استلحق اللي يطلبون النواميس = اللي من الاقصين وادنا اللحومي
وان جن بالميدان مثل الدواويس = وتعاقبوا من فوقهن السهومي
عرج باهلهن كنهن القرانيس = على الطريح مصوبراتن كظومي
لومي على اللي ينقلون العبابيس = واهل الفرنج وكل رامي لحومي
وشلفن تركب بالعروق المناسيس = وقحص المهار وكل قب قحومي
واليا سمك عج الرمك بالملابيس = المسعد اللي حظ ربعه يقومي
الشيخ من يعطي الفقارى المفاليس = يبدل الساعة بعز يقومي
والحر ليا دبت عليه النواميس = يشهر وعن دار المذلة يشومي
واليا اكترب من بعض الاشيا نسانيس = اعزموا لابد الفرج بالعزومي
ثوب الشرف لبسه نظيف الملابيس = ينجيك باليام الكرب والزحومي
يجلي صدا قلبي ضبيح المهاريس = لي قام شراب القهاوي يعومي
والدلال فوق النار دايم مجاليس = اكرامه حق علينا لزومي
من صنعة الصبة وخمسة تخاميس = ذرية يعمل بها كل يومي
وبهارهن هيل بليا حواسيس = كيف يعدى للنشاما القرومي
عده لحماي العياد المراويس = ولا الحصان اللي بقينه وهومي
حتى يطب لنا المثل والتوانيس = والكيف طاب لمن يفك القحومي
وصلاة ربي عد رمل الطعاميس = على شفيع الخلق يوم اللمومي
عد البنات وعد ذار الطعاميس = واعداد مايمطر سحاب الغيومي
******** type="****/**********">doPoem(0)***********
فكانت اولى الغارات التي شنها تركي على خيل ابن هادي واخذ الكثير من الخيل ثم أقاموا الصلح بين الطرفين على ان يحترم كل منهم الجوار ويأدي كل منهم مايفقد من الاخر من خيل وابل وفي نهاية المرباع فقد قحطان
اربعا من الخيل واخذ قعود عتيبي يدعى زبن قيل انه اخذ من المناديب الذين ارسلوا في اول الوقت فأدى تركي خيل قحطان ولم يأدي ابن هادي قعود زبن فاغضب ذلك تركي وقال
يازبن كرب فوق مايطرد النوم = حراير يازبن مثل الاهله
مرباعهم مابين ظلم والكموم = ومن السفيف يرمحن الاظله
ملفاك شيخ بالقسا يذبح الكوم = شيخ وشيخان القبايل تدله
تلقى محمد زبن من جاه مضيوم = زبن الذليل اللي مخيف محله
وليا لفيت الشيخ يازبن ملزوم = تعطيه مرسوم في وسطه سجله
وان كان جيت النضو يازبن ماسوم = رد الخبر والنضو يازبن خله
جانا من الشايب مكاتيب وعلوم = حي الكتاب اللي لفا حشمة له
الشايب اللي ينقل الكبر والزوم = باغي لحكمي مير انا عاصي له
الله يغشك يوم غشيتنا اليوم = تقرا الكتاب ولا تهاب المظله
جزاك من عندي من الخيل حثلوم = مثل البرد من مزنة مستهله
ان كان تذكر سابق لك من اليوم = فرس عتيبي ورد شاهد له
انا رمحي باول الخيل ملحوم = والا انت رمحك عند ساره تشله
اديت انا اربع قحص والخامس التوم = بقعود زبن اللي بغي ماحصله
والحرب شب وشبشبه كل شغموم = من شبته ملح الفرنجي عصا له
اعرف ترى من طاح ماهوب مرحوم = اكود من رب الملا شافع له
شافي وجرمان غدوا باول القوم = خلوا امطوعهم وانا شاهد له
خلوا مطوعهم على غوجة التوم = وعزي لمن حط الردي مسند له
وانتم كما حوت على الشط لاهوم = وحنا اخلقنا للواهيم عله
وانتم كما ضلع طويل ومزموم = وحنا خلقنا الله انجوم تهله
وانتم كما طير البحر ذاك ابا الحوم = وطير البحر مايذبحه غير ظله
******** type="****/**********">doPoem(0)***********
وهذا رد الشيخ ابن هادي
حيّ الكتاب اللي من الزاج مرشوم = حـيّه وحيّ اللي مشى حشمة(ن) له
ساعة قريته شفت ماعفت مرسوم = ردّ النقا تركي وهو منحي(ن) له
يا سابقي غاشن عتيبه منك لوم = مثل الربيع اليا غشى نجد كله
كدّي عـلى العتبان خمسة عشر يوم = قعدان والجمال بيتي هل(ن) له
أطلب عسى نجد(ن) من الوسم ماسوم = حتى تقرّب حلّة(ن) صوب حـلة
وان كان رمحك بأول الخيل ملحوم = فانا برمحي حامي(ن) نجد كله
من شافبا بالحلم يقعد من الـنوم = ون شافنا بالعـلم بطنه يهله
عدونا لو جض فلا هوب مليوم = واللي وراه يجضّ من جضة(ن) له
حربك اليا جانا نقلناه بسهوم = وتر حربنا لا جاك ما حــتلت شله
وان كان تطري النجم فالنجم مفقوم = والنجم يدوي والجبل راسي(ن) له
مانشتحن للحرب والحرب مفهوم = ويا سعد من حن باللقا فزعة(ن) له
ماخلقت الدنيا ولا الناس في يوم = واللي تمنى حربنا مضحّـي(ن) له
وان كان في نفسه فلاهوب مليوم = نعم الشوارب وافي الشبر كله
متوسط(ن) مابين عتبان وبقوم = والله علم في دقّ سلكه وجله
******** type="****/**********">doPoem(0)***********
ــــــــــــــــــــــــــــــــــــــــــــــــــ ــــــــــــــــــــــــــ
( معركة البديعه )
وحينما جاء العام الثاني وربعت نجد نزل الشيخ تركي بعتيبة دون ان يطلب الجوار من ابن هادي فازداد الشيخ محمد غضبا وارسل لتركي يعلمه بوجهة نظر المتمثلة في احد الامور الثلاثة اما رجوعهم واما خفرهم ( اي الجزيه )
واما الحرب فختار الشيخ تركي الامر الاخير وهنا بدات الحروب الفعلية وارسل الشيخ تركي قصيدتان للشيخ محمد الاولى يعلمه بختيار من الامور الثلاث والثانيه يعلمه ان عتيبة لم ترد الحرب وانه اضطرها للحرب وهي ليست
عاجزه عن الحرب
وهذه قصيدة الشيخ تركي لابن هادي التي يعلمه بها عن اختياره من الامور الثلاث
خط القلم واكتب لنا ياسليمان = اكتب لنا جعلك تطـب الجنانـي
جعلك تطوف البيت مع كل الاركان = وتصلي الجمعـة بهـا دور ثانـي
هـذا محمـد مانبيعـه بالاثـمـان = عبـدٍ مطـوع شاعـرٍ مطربانـي
قم كيَف الطبخه ترى بان لي شـان = مشتان في شـانٍ وشـانٍ عنانـي
بريَةٍ من سـوق صنعـا ونجـران = يعبـا لهـا بالهيـل والزعفرانـي
نخسر لها لو كان تغلـي بالاثمـان = لا هابها خطـو الصبـيَ الهدانـي
بصينٍ يبدَى فيـه ذربيـن الايمـان = بكفـوف ظفـرانٍ قـرومٍ ذهانـي
ياراكبٍ من فوق سلسات الاقـران = فجَ العضود وساسهن من عمانـي
فجَ العضود فخوذهن تقـل بيبـان = وساع الزغون موخَرات الثفانـي
ملفاك من يروي شبا مقدم الـزان = عيد الركاب اللي بها الحيل وانـي
شيخٍ نشا بالطيب من روس قحطان = عاداتهم فـكَ النشـب والعوانـي
مطلوبكم ياشيخ بـه زود حقـران = والذلَ مايرضي عريـب المجانـي
لو أن مطلوبك على مثـل ماكـان = خفَـت مداريجـه علينـا وهانـي
أدرا كلامي عـن عـدو وسفهـان = لزَازة المجلس وجيـه الحصانـي
للهـرج ميـدانٍ وللرمـي نيشـان = ومفتاح صندوق الضمير اللسانـي
******** type="****/**********">doPoem(0)***********
ارسل الشيخ هذال بن بصيص الى الشيخ تركي بن حميد يخبره انه سيقاتل الى جانب عتيبة في هذه الحرب وكان الشيخ سلطان بن ربيعان شمال النير وعلم بفزعة ابن بصيص للشيخ تركي وعتمد على ذلك لأن ابن بصيص اشترك مع الشيخ سلطان في معركة طلال (الاولى)ولم يحضر بالروقه
وروق وبرقا فعلهم واحد
فلما التحمت الجموع انسحب ابن بصيص وترك برقا تواجه قحطان لوحدها فصاح الشيخ تركي لبرقا معتزيا
( برقا يابرقا اليوم يومكم ) وهزموا ابن قرمله ,
ومما يذكر ان الشيخ تركي بعد هذه المعركة غزا على الصعران بسبب مافعلوه بالبديعه وانسحابهم والذي يقرأ القصيده ويتمعن فيها جيدا يرى
ان الشيخ تركي ذكر ذلك بالقصيده
من عقب هذا لامطير وحنا = لا صلب جد ولابهم نية الخير
لاكنهم يوم انجلا السو عنا= هذا طريح وذاك ذب المعابير
******** type="****/**********">doPoem(0)***********
قال الشيخ تركي هذه القصبده يوجهها للشيخ سلطان بن ربيعان
اراكب اللي بقلهن قد تثنا = فج العضود مدمثات المحاصير
لاهن قعس ولاهن بدنا = ومتيهاتٍ في ليالي المخاضير
الصبح من وادي الرشا ينشرنا = من بيت ابو خالد زبون المقاصير
يلفن ابو تركي زبون المجنا = ريف الهشالا في ليال المعاسير
الشيخ مثلك ما نزل شعر عنا = وادنا عتيبه حايلٍ دونه النير
جانا الصعيري قال صولو وصلنا = صلنا نحسب انه على راي تدبير
اثر الصعيري فزعته ماج عنا = واقفن ظعونه عقب ماهن مناحير
وجينا على ركن الحريب ونزلنا = وصرنا دواوير وصارو دواوير
يا كبر زبر جموعهم يوم جنا = ارواحنا ترخص وهي للمقادير
بايماننا صوارمٍ يقطعنا = سقى القنيده من حقوق الشخاتير
ومن عقب هذا لا مطير وحنا = لا صلب جد ولا بهم نيه الخير
لكنهم يوم انجلا السو عنا = هذا طريح وذاك ذب المعابير
لي لابةٍ تشلع من السن سنا = ان كان بالغارات ولا الطوابير
ناسٍ اليا ركبو على القحص جنا = في منتهاه ننزح النمر والزير
******** type="****/**********">doPoem(0)***********
شعراء عتيبة (تركي بن حميد)
أبو عبدالرحمن بن عقيل : في كتابه ديوان الشعر العامي بلهجة أهل نجد
أبن بليهد: في صحيح الاخبار
روايه عن فراج بن طويق الحافي
وماتطباق من الرواه
ــــــــــــــــــــــــــــــــــــــــــــــــــ ــــــــــــــــ
مناخ الشعراء
وتسمى هذه الوقعه تسمي عند عتابه بمناخ عرجا وعند مطير تسمي الدوادمي
حصلت هذه الوقعه عام 1313هـ واطراف هذه الوقعه عتابه ضد كل من قحطان ومطير وحرب.
قحطان كانت علي الحسرج ومطير علي الدوادمي وحرب علي عرجا
وعتابه برقا فقط علي الشعراء.
اجتمعت قبيلة مطير,علوى بقيادة
(عماش الدويش ووطبان الدويش من الموهه ) وبريه بقيادة
( نايف بن بصيص من الصعران ) على مياه قرب الدوادمي, وكانت حرب بقيادة
( صنيتان الفرم وعبدالله الفرم ) ومعهم بني علي على عرجا, وبرقا من عتيبه بقيادة
( محمد بن هندي ومناحي الهيضل ومشعان ابا العلا ) على الشعراء.
وارادوا المطران قتال برقا واخراجهم من ديارهم , وفعلا بدؤا بالحرب على برقا واستمرت الحرب وكانت الغلبه فيها لبرقا وطلبت مطير العون من حرب وفعلا انضموا اليهم وجاء مدد من الروقه لبرقا , فانسحبت مطير ليلا بعد ان تركوا نيرانهم مشبوبه فاذا ببني عبدالله وحدهم يواجهون عتيبه بعد انسحاب من طلب منهم العون.
وقال فراج التويجر في هذه المعركه:
ياليت نايف حاضر دقلة جملنـــــــا=حتى يخلي نجد بالقلب النظيــف
رديفكم شلناه من عرجا لاهلنـــــا=واكبر عليكم يا مخلية الرديـــــف
العام يوم انك طلبته ما تونـــــــــا=واليوم خليته بعد جالك حليــــــف
عتيبه ليامن الحرايب ولعنـــــــــا = منزحه عن نجد دقلات الحفيـــــف
نمشي وتالي الليل يري به ضعنا=ونقل المثقل عندنا نقل الخفيـــف
وحنا لهم مثل الجمال اللي تثنــــا =شيالة الحمل الثقيل عن الخفيــف
في نجد خلينا القبايل ما تهنـــــا =وكم واحد من ضربنا اقفى معيف
******** type="****/**********">doPoem(0)***********
علما بان محمد بن هندي عندما علم بمدد حرب ارسل للفرم شيخ حرب مرسولا يقول له مالك ومال هذه الحرب لانه ليس من صالحك ان تقف بجانب مطير وحذره من الوقوف بجانب مطير وقحطان فرد عليه الفرم بانه قد التف عليه فرسان حرب ويريد ان يجربهم في فرسان عتابه ( معنا كلامه انه ليس بخائف من تحذير ابن هندي وانه علي موقفه مع مطير وقحطان )
و
لم تستطع هذه القبائل علي كسر برقا .
ولما علم الروقه ان كل هذه القبائل تقاتل برقا وان حرب امدت مطير وقحطان
اتو الاد روق لمناصرة ابناء عمومتهم برقا .
عندها علم نايف بن بصيص بمدد الاد روق قال هذولا برقا قسم من عتابه وماقدرنا عليهم وش لون والحين روق اتت لمناصرة (ايقن بالهزيمه النكراء) واشار علي مطير ان تنسحب وعلي قحطان من دون علم قبيلة حرب .
فسرو ليلا ونيرانهم مشبوبه لكي لايحس بهم احدا .
فلما اصبحو وعلم العتبان بهذا الانسحاب اتت عتابه علي حرب وصمدت حرب واستبسلت امام عتابه واضهروا شجعاتا لم تتوفر في مطير وقحطان في تلك الوقعه .
ولكن كسرتهم عتابه وتراجعت حرب .
وقد فر الفرم من هذه الوقعه وهو متنكرا بزي اخر لكي لايعرفه فرسان عتابه.
وهذه بيت من قصيده لا اعلم قائلها ولكن سمعت انها لشديد الحثري العصيمي ولست متاكد ارجو من تكون لديه هذه القصيده كامله ان يوردها وان يخبرنا بشاعرها
اللي علي الحسرج طقع وانحاش=اوحا صياح اللي مع التسرير
******** type="****/**********">doPoem(0)***********
ويقصد قحطان علي الحسرج ومطير وحرب علي التسرير (وادي الرشا)
ـــــــــــــــــــــــــــــــــــــــــــــــ
كــون المجمعة
مناخ المجمعة
مناخ المجمعة كان بين الملك عبد العزيز تسانده قبيلة عتيبة وقبيلة مطير ، والسبب في هذه المعركة هو خروج الدويش عن طاعة الملك عبد العزيز فتوجه إليه الملك عبدالعزيز بعتيبة الد أعدائه والتي كانت فرس السبق عند الملك عبدالعزيز . واستطاع الملك عبدالعزيز وعتيبة هزيمة الدويش هزيمة قاسية اضطر الدويش فيها إلى الهرب والأ لتجاء إلى خلف اسوار مدينة المجمعة بعدما قتل فرسان مطير وأخذ ت ابل الدويش ، واضطر بعدها مرغما على طلب العفو من الملك عبد العزيز .
والحقيقة ان المعركة الحقيقية كانت بين عتيبة ومطير ، وكانت عتيبة في هذه المعركة ترد على مطير و هجومها على عتيبة قبل هذه المعركة في رضيمة المستوي عام 1324هــ والتى لم تخسر فيه عتيبه الشيئ الكثير سوى ذود لأحد الثبتان ، ولكن الذي أعطى هذه الكون اكبر من حجمه هو قصيدة الشاعر حنيف بن سعيدان والتي يقول منها :
يــاشيــخ مــالك حــليٍ مــع الناس =كــونك صباح وكـون غـيرك نهـابة
******** type="****/**********">doPoem(0)***********
وقد رد عليه الشاعر سلطان المريبض بعد مناخ المجمعة بقصيدة التي يقول منها :
لـيــا جـــاك طـرقــي العتـيـبـي بـعــد يـــاس = يـنـشـد عــــن الـعـتـبـان صفوة شـبـابــه
******** type="****/**********">doPoem(0)***********
وقد كانت هذه المعركة خسارة كبيرة لقبيلة مطير ، فقد خسرت ثلاثة من أبرز فرسانها وهــم :
(1) حسين بن الجبعا الدويش
(2) حسين بن شوفان
(3) محسن بن زريبان
والذين قتلوا هؤلاء الفرسان من عتيبة هم :
(1) الفارس الشيخ مرزوق بن وبصان شيخ قبيلة الغنانيم
(2) الفارس الشيخ عــقاب بن ربيعان
(3)الفارس راكان بن عبدالله بن صلما الثبيتي
وقد أصيب في هذه المعركة الشيخ فيصل الدويش والفارس بندر الدويش ، كمـا استولى فرسان عتيبة على الودايع والمعيد
وهــي رعيتان كبيرتان للـدوشان ، كما غنم الملك عبد العزيز ابل فيصل الدويش وهي الشرف .
سنحاول الآن التعرف على احداث هذه المعركة في ضوء المصادر التاريخية الموثوقة وما يساندها من الموروث العامي من أشعار وروايات :
قال المؤرخ ابراهيم القاضي :
" كان فيصل الدويش عند اغارة ابن سعود على شمر( باين شينه ) ويضهر عليه التضجر من عبد العزيز بن سعود وهمّ ابن سعود بقتل فيصل الدويش وإذا قومه الذي معه من البادية مطير وعتيبة ؟؟ ثم أحضر كبار العرب وقال وش ترون؟ وهو مدخل العلم مع محمد بن حميد وكبار عتيبة. وقالوا ما لك إلا تنكف. ابن رشيد دخل ديرته، وشمر هجوا، وأنت لاحق عليهم، قال انكفنا. ثم انكف القوم. والمقصد نكوفة مطير لا ينذرون. وواعد عتيبة يلتوون من قفا القصيم ووعدهم الأسياح.. ثم ركب ابن سعود وسار مجنب يزعم أنه منكف لديرته ثم عارضوه عتيبة وعدا في فيصل الدويش وأغلب علوى معه هاك الوقت. انتذر الدويش، وزبن المجمعة وهي في هاك الوقت قوم لابن سعود، ونزل تحت الجدار ، وظهروا أهل المجمعة مساعدين الدويش .؟ ابن سعود زتّها عليهم، وتهيا ملحمة وكون جيد، وكسرهم ابن سعود، وحجرهم داخل الجدار: البدو والحضر والطالعي أخذه كله. صوب فيصل الدويش صواب شين، والذي صوبه فاجر ولد شليويح. ثم انكف ابن سعود ودخل ديرته في ربيع آخر سنة 1325هـ." اهـ . ( 1 )
قال الدكتور عبدالله بن عثيمين في كتاب تاريخ المملكة:
" وانطلق الملك من بريدة حيث انضمت اليه فئات من قبيلة عتيبة بقيادة محمد بن هندي . وعلم الدويش بتحركهم
نحوه ، فمضى إلى بلدة المجمعة ، وعسكر خارجها . ودارت بين الطرفين معركة ضارية جرح خلالها الدويش ، واضطر اتباعه ومن انجدوهم إلى د خول البلدة والأحتماء بأسوارها . وكسب الملك ومن معه ماكان خارجها من إبل مطير وأمتعتها . ثم طلب زعيم مطير العفو من الملك ، فعفا عنه . وكانت تلك المعركة في الثالث والعشرين من ربيع الأول عام 1325هــ "
وفي الهامش الثاني في نفس الصفحة تعليقاً على جرح الدويش " يقول الذكير ( نسخة خاصة ، ص80 ) : إن الذي جرحه وألقاه من ظهر جواده فاجر بن شليويح . ويورد تفصيلاً عن مبارزتهما . ويذكر ذلك القاضي ،ص27 ( 2 )
وقال الشيخ مرزوق بن وبصان شيخ الغنانيم من ذوي عطية من الروقة في كون المجمعة حينما قتل الفارس الشيخ حسين بن الجبعا الدويش :
خل الرمك تاطى على ابن الجبعا = لو كان خيال ودويش
من عقبنا تمسي الضرايا شبعا = والطير نرمي له وليش
******** type="****/**********">doPoem(0)***********
وقال الشاعر نامي بن ثعلي العضياني في قصيدة طويلة في :
جازوك با للي فات ذ خر محصن = بالكون الأول واوتلم للثاني
كـــون عليكم غـــايب شيـــطانه = يا مرضعة شبابة الضياني
كله لعام كونكم با لملحا =هذا خلاص الدين للدياني
******** type="****/**********">doPoem(0)***********
وقبل مناخ المجمعة قال الشيخ فيصل الدويش يحدو ويتحدى عتيبة :
يا واصلن مني الدوشــــان = لباسة الجوخ الجديد
والله لطارد سربة العتـبا ن = وش عاد لوني وحيد
******** type="****/**********">doPoem(0)***********
وبعد المعركة رد عليه الشيخ ذعار بن مشاري بن ربيعان وكان رداً أدبياً بعد الرد القاسي في ميدان المعركة :
يا طارش مني لأبن سلطان= حرٍ مقانيصه بعيد
كان يتمنى سربة العتبان = يبشر بها علم وكيد
يبشر بخيل فوقها فرسا ن= بيدينهم صافي الحديد
من فعلهم عينت ابن شوفان =وحسين حماي البليد
وبندر رموا به داخل الميدان= وهو على السنة وكيد
والبل خذيناها با لحيطان = وخذنا الودايع والمعيد ( 5)
******** type="****/**********">doPoem(0)***********
وقال الملك عبد العزيز يخاطب فيصل الدويش بعد المعركة :
وش انت خابر يانفيش = المـــجـــمعة خــليتــهــا
يومك تتقي بالعريش = والشرف ما فكيتـــــها
من فعلنا قلبك خريش= والمــرجــلة خــليتــها
كلٍ يلومك يا ا لدويش= مــن ذ لــة ذ ليتـــهــــا ( 6)
******** type="****/**********">doPoem(0)***********
ويقال انه دخل الفارس الشيخ فاجر بن شليويح مجلس الملك عبد العزيز وكان في المجلس مجموعة من شيوخ القبائل ومن ضمنهم الشيخ فيصل الدويش ، فرحب الملك بفاجر وأ جلسه بجانبه وحول حديث المجلس إلى فاجر ، فقال الشيخ فيصل الدويش : من هذا الرجل اللي راحت له السوالف عــنــا ، فرد عليه الملك : هذا فاجر بن شليويح ، فقال الدويش : هذا فاجر بن شليويح العطاوي هذا اللي ما غــيــر دقن وعين ، فقال فاجر : نعـم واطلب من الله ان يجمعنا على ظهور الخيل حتى تشوف فــعــلي ، فقال الدويش : بـيــنــي وبـيــنــك الله وفـي كــون المجمـعـة بـيـن المـلـك عـبـد العـزيـز ومعه عتيبة من جهة والدويش ومن معه مـن جهـة،وكـــان فــاجــر يــــردد هــــذه الــحــداه:
حـمـر[ن]مــغــذاة[ن] بـــــــزاد الــبــيـــت =وأذبـــح لـهــا الـشـتــوي مــــن الـحـيــران
لــيـــا لـبـسـوهــا لـلــطــراد وجـــيـــت = بـنــطــح عـلـيـهــا ســربـــة الـــدوشـــان
وابـــــا عـلـيــهــا كــــــل مــانــويــت =انــطــح بــهــا فـيـصــل ولــــد سـلـطــان
والله لا حــــــط بـخــشــمــه الـحـلـتــيــت = بــكــره لــيــا جــــاء لـلـرمــك مــيـــدان
ويــامــا عــلــى تــــال الــرمــك عـيـيــت = مـــن فـــوق حــمــر[ن] كـنـهــا الـشـيـهـان
******** type="****/**********">doPoem(0)***********
بعـد كـون المجمعـة وبعـد ان اصـاب الشـيـخ : فـاجـر الشيخ فيصـل بـن سلطـان الدويـش كـان سلطـان المربيـض الرويـس العتيبـي فـي الكـويـت ويتحـرى الأخبـار عـن الملـك عبـد العزيـز رحـمـه الله وقبيلتـه عتيبـه واذا بالطراقـي فنطـلـق لــه مسـرعـاً وطـلـب مـنــه العلوم ،وأخـبـره بـمـا حــدث فـقــال هـــذه القـصـيـدة:
لـيــا جـــاك طـرقــي العتـيـبـي بـعــد يـــاس = يـنـشـد عــــن الـعـتـبـان صفوة شـبـابــه
ماعـــد ك يــــم الهضبة اللي بها ا رواس = الـــلي يـــرد بـــها الشـــعرا جـــوابــــــه
لا جيت هــا ك الدا ر تلقى بها اونا س = امـــا دبــش والا تــواجـــه عـــتــابــــــه
يتلــون ابن هندي حــمى قـــب الأفراس = لا قـــام يــنخى و الـــرمك فــي انحطابــه
يــثــنــي جــواده للـــمــتــلـين نـــكــاس = وكــــم واحـــد مــن غـــرقـــة الموت جابه
ويـــوم اـرضــيمـة لــهست ذيب الامراس = وحـــتى ا يش يــاذود وخـــذ لـــه نــهــابة
وردوا عــليه عـليه موردة كـــل مـنساس = وتفا ولوا بحسين ذيب الذيابة الـذيــابــه
وقــفــــوه ابن شـــوفان خــلي بلا راس = ومحســـن عــليه الــترف شــقــق ثــيابه
وبنــدر كســير وجــنب البوش الاجنا س = وفــي غرس ابن عولة يذكزر وزى به
فـيـصـل بسـيـفـه ضـربـتـه تـشـلــخ الــــراس = تـنــاوشــه فــاجـــر ومــكـــن صــوابـــه
زبن عـلـى الـلــي تـثني الـذيــل والـــراس = وفـتــح لـــه العـسـكـر عـقــب صـــك بـابــه
ابـــا الـفـراسـه جــــاه فــــراس الأفــــراس = عــصــاه لــيــن انــــه تـقـطــع عـقــابــه
بــــدل هــديـــره بـالــرغــى والـتـفـحــا س = حـــدر عــــن الـمـسـنـاد ، يــــم اللهابــــه
******** type="****/**********">doPoem(0)***********
الهوامش :
(1)ابراهيم القاضي ، تاريخ نجد ، صـــ 27
(2)عبدالله بن عثيمين ، تاريخ المملكة ،ج 2 ،112
(3)ابوعبدالرحمن ا لظاهري ، مجلة العرب ج 11و12 سنة 1402هــ
(4) لقاء مع خالد بن مشعان بن فاجر بن شليويح العطاوي ، جريدة الرياض عدد 10148 يوم السبت 18/ 11/ 1416
(5)برواية الشاعر كديميس العصيمي
(6)احمد فهد العريفي ، حداء الخيل ، صــ22
ــــــــــــــــــــــــــــــــــــــــــــــــــ ـــــــــــ
بحـــث واعـــــداد
باحث قبيلــــــه عتيبــــــــه
عباس مشعل الشيباني 
العضو الأكثر نشاطاً هذا اليوم 
فعاليات المنتدى
الإهداءات
قبيلــه عتيبــــَــه . نســب . فرســـان . معارك . ديار وموارد . شعراء . بحث متكامل
العرض العادي
